Udalak eta Nafarroako Gobernuko Sustapen eta Etxebizitza Departamentuak herriko Udal Hirigintza Plana idazteko lehenbiziko urratsa eman dute, lurraldearen antolaketarako gai nagusiak bi erakundeen artean adostu eta zehaztu ondotik.
Marie Gomez Sanchez, Etxebizitza eta Lurralde antolaketarako zuzendari nagusiak eta Patxi Otxandorena alkateak maiatzaren 10ean Herriko Etxean sinatutako agirian zehazten dira gai nagusi horiek.
Dokumentu horren arabera, NA-4040 errepideak lotzen dituen bi herrigunek osatzen dute Beintza-Labaien. Ingurumen arloari dagokionez, natur eremu direla aitortutako tokiak lurraldearen antolaketarako osagai garrantzitsuak dira (Belate eta Leurtzako urtegia), baita erabilera publikoko mendiak (Elluldea, Urraldealdea, Oalegialdea, Larrezabal eta Ameztia Asura) eta Ameztia ibaiaren eta Xakarriturri, Larraitzerreka-Ello eta Zubiñetako erreka-Olatzuko erreken ekosistemak ere.
Hirigintza Planak herriko ondarea zaharberritzearen alde ere eginen du, gaur egungo beharretara egokituz, baina arkitektura eta hemengo ezaugarriak errespetatuz.
Lurzoru ez urbanizagarrien kasuan, aipatu, hainbat lur eremu bereiziko direla babestuak izan daitezen.