Joan den abendura bitarte, Iratxe Kontsumitzaileen Elkarteak kontsumitzaileentzako 72 informazio bulego kudeatzen zituen Nafarroan eta udalen laguntzari esker, kontsumitzaileen kezkak dohainik artatzen zituzten. Nafarroako Gobernuko Kontsumo Zerbitzuak ekimen honetarako 84.000 euro bideratzen zituen eta dirua udalen artean banatzen zen.
Aurtengorako ere, Nafarroako Parlamentuak kopuru bera onartu zuen, baina Kontsumo Zerbitzuak diru hori udalei ez ematea erabaki du, eta diru hori zazpi udaletan Kontsumo Zerbitzuaren bulegoak zabaltzeko erabiltzea. Eta erabaki horrekin haserre agertu da Iratxe Kontsumitzaileen Elkartea, eta Gobernuko Kontsumo Zerbitzuaren jarrera salatu du: «kontsumitzaileen informazio bulegoei laguntza ekonomikoa kentzeaz gain, bulegoak ixten saiatu da».
Murrizketak murrizketa, eskualdeko udal eta mankomunitateek zerbitzuaren gastua euren gain hartu eta Iratxeren zerbitzua eskaintzen segitzea erabaki dute. Mikel Bezunartea Iratxeko ordezkariak baieztatu digunez, «Mendialdean eta Iruñerrian zerbitzuak berdin segitzen du». Gisa berean, gaineratu du «Leitza, Baztan eta Bortzirietako udalek bere gain hartu dutela zerbitzuaren gastu guztia». Aldiz, Malerrekako Mankomunitatearekin bertzelako hitzarmena sinatu du Iratxe Elkarteak: «gastuaren erdia Mankomunitateak ordaintzen du eta bertze erdia gure gain hartu dugu». Udalek Iratxeren zerbitzuaren alde egin izana nabarmendu digu Bezunarteak: «azpimarratzekoa da Donezteben eta Altsasun Gobernuko Kontsumo Zerbitzuak kontsumo bulegoak zabaldu dituela, baina hala ere, udalek gure zerbitzuarekin segitu nahi izan dute. Izan ere, zerbitzu diferenteak dira, eta Kontsumo Saila aspalditik dugu Nafarroan eta badakigu zer egiten duen, zer egiten ahal duen eta politikoki zer interesatzen ahal zaion. Eta gu, kontsumitzaile elkarte garen aldetik, gure helburuak eta jarduerak arront diferenteak dira eta horregatik egin dute udalek gure aldeko apustua».