Urteroko ohiturari eutsiz, maiatzeko lehendabiziko igandean Itur-Ondo elkartearen besta eguna izan zen.
Eguerdian aizkora apustua jokatu zuten herritarrek. Alde batetik, Dolareko Jesus eta Mitxeteneko Jose Luis aritu ziren, eta bestetik, Otxoneko Jazinto eta Maizenekobordako Xabier. Labaiengo plazara hurbildu zirenak gustura gelditu ziren aizkolariek egindako lanarekin gozatuz. Oso lehia polita izan zen eta azkenean, irabazleak Jesus eta Jose Luis izan ziren.
Ondotik, bazkaria egin zen elkartean eta giro onean joan zen. 45 lagun elkartu ziren eta gehienak musean aritu ziren bazkal ondoan. Otxoneko Jazinto eta Txispeko Urbanok irabazi zuten mus txapelketa eta azpitxapeldunak Jabier eta Joxe Mari izan ziren. Txapeldunek bina botil ardo irabazi zuten eta azpitxapeldunek bana botila.
Duela hamahiru urte sortu zen Itur Ondo elkartea eta lehendabiziko bazkideen auzolanaren bitartez atera zen aurrera proiektu hau. Geroztik hainbat besta ederren lekuko izan da elkartea eta ekitaldi ugari ere antolatu dira Itur Ondotik: mendi irteerak, aizkora apustuak, Urriruko besta, inauteriak, otordu ederrak...