Ohiturari segituz, maiatzaren 7an Aralarko aingeruaren bisita izan genuen herrian. Arratsaldean etorri zen eta On Jesus Sotilen eskuetan elizara ailegatu zen momentuan euria hasi zuen. Hainbat herritarrek ongietorria egin zioten atarian, eta ondotik, meza entzun zuten. Musu eta agurrak ere ez zuten hutsik egin.
Honekin lotuta, bada aipatzeko moduko bitxikeria bat. Izan ere, San Migel eta gurutzearen musuaren testigu lana egitera egun honetan San Rafaelen irudia ateratzen dute elizatik. Urte osoan San Migelen bisita hartzen den egunean bakarrik ateratzen da elizatik San Rafael, eta aurten ere horrela izan da.
Elizkizunen ondotik, San Migelen irudia udaletxera eramateko ohitura ere badago, han udal ordezkariek harrera egin diezaioten. Aldi honetan, tabernara joan ziren guztiak eta han eman zioten zinegotzi eta alkateek irudiari musu. Ondotik, udal ordezkariek eta San Migelen irudiarekin etorritako guztiek elkarrekin afaldu zuten.
Hitzordu garrantzitsuena
Duela urte asko, San Migelen etorrera herritarrendako bisitarik garrantzitsuetariko bat izaten zen. Ia herritar guztiak joaten ziren Perralekuko mugara, Goizuetatik zetorren aingeruari ongietorria egitera eta ermitarako bidera ailegatu arte laguntzen zioten kanpai eta suziri artean. Han egoten ziren apaiza eta sakristaua gurutze haundi batekin eta elizako beste aingeru baten irudiarekin. Aingeru eta gurutzearen arteko musuaren ondotik, elizaraino prozesioan joaten ziren herritarrak. Biharamunean, meza izaten zen eta Eratsungo mugaraino laguntzen zioten gero.
Euria aipatu dugula, bada aipatzea merezi duen beste kontu bat ere. Herriko adinekoen arabera, uholdearen pasadizoa joan den mendekoa da. Nonbait, garai hartan lehorte haundia omen zegoen eta herritarrak uzta galduko zuten beldur, urdurituak eta ikaratuak omen zeuden. Hala, behar zuten ura ekartzeko erregutuz egin omen zuten santuarekin prozesioa. Ura eskatu bai, baina ez zen nahi zen erantzunik izan, eta diotenez, zenbait lagun elizan sartu ziren gauez eta irudia hartu eta ostatuaren ondoan zegoen iturrian sartu omen zuten. Santuaren mendekua euri-erauntsi izugarria izan omen zen, baina herria maldan dagoenez, ez zen kalte haundirik izan.