Malerrekan errotuluak euskaraz paratzeko dirulaguntza deialdia egin du Mankomunitateak eta abenduaren 31n akituko da eskaerak aurkezteko epea. Errotuluak euskaraz jartzen dituzten establezimendu komertzialei (dendak), ostalaritzakoei (ostatuak) eta elkarteei dirulaguntzak emanen zaizkie.
Dirulaguntzaren eskatzaileek eskabide eredu ofiziala behar den moduan beteta, fakturaren kopia, IFKren kopia, errotuluaren justifikazioa (argazkia) eta Malerrekako Mankomunitatearekin betebehar fiskaletan egunean dagoela egiaztatzen duen agiria aurkeztu beharko dute Mankomunitatean.
Egitasmo honek 2.000 euroko aurrekontua dauka eta akitu arte emanen dira dirulaguntzak. Euskara hutsean idatzita dagoen errotulua jartzen dutenei gastuaren erdia ordainduko zaie, 300 euro gehienez. Euskaraz eta erdaraz, elebiz, errotulua jartzen dutenei gastuaren %25 ordainduko zaie, gehienez 150 euro. Kasu honetan, errotuluaren testuan euskarak beti lehentasuna izan beharko du, euskarazko testuak tamainaz handiago paratuz edo azpimarratuz. Eta ez dute dirulaguntzarik jasoko soilik izen-abizenak edo toponimoak dituzten errotuluek, ezta gaizki idatziak edo oker gramatikalak dituztenek ere.
Euskara Zerbitzuak aholkularitza eta itzulpen zerbitzua eskainiko die doan errotulua euskaratu nahi dutenei.