Apirilaren 22ko Frantziako hauteskunde presidentzialen lehen itzuliak argiki erakutsi du Senperen ere ezkerrak gero eta indar gehiago duela, bainan eskuinak indartsu izaten segitzen duela. Gure herrian Sarkozy eskuindarra izan da hautagai bozkatuena, eta ondotik, datoz Hollande sozialista eta Bayrou zentrista. Aipagarria da Senperen eskuin muturraren bozen kopurua bi aldiz baino gehiago hazi dela bortz urtez. Halere, Fronte Nazionala laugarren indarra da eta ez hirugarrena Frantzia osoan bezala.
Parte hartzea %81,1koa izan da, duela 5 urte %85,4koa izan zen. Orain, bigarren itzulia igande honetan, maiatzak 6, ospatuko da eta ereiaroaren 10 eta 17an hauteskunde legegileak eginen dira.