Apirila hilabete bizia izan da herriko kirolarentzat, eskubaloiari dagokionez batik bat. Errekako bi taldek ligako Final Four-a jokatu dute denboraldi bikain bati bukaera emateko. Senior mailan Uharten jokatu ziren partidetara 250 jarraitzaile inguru hurbildu ziren ingurutik taldea animatzeko, bonbo, kamiseta, pankarta eta guzti. Giro paregabe honetan, lehenbiziko partida Errekak Oberena taldearen aurka jokatu zuen. Nahiz eta nahiko urduri hasi, lehenbiziko zatia bi golez irabaziz akitu zuen. Bigarren zatian partida dominatu zutela argi utzi zuten eta akitzeko 15 minutu falta zirela, bortz golez irabazten zihoan Erreka. Hemendik aitzinera dena aldatu zen, arbitroa ederki arduratu zen hori horrela izateaz; Errekak jokalari bat eta bi guttiagorekin jokatu zuen akitzeraino. Luzapenera iritsi zen partida eta markagailuan 24ko berdinketa zegoela, hondarreko bi segundoetan Oberena taldeak gola sartu zuen kontraerasoan, Errekaren aldeko penalti argi bat ez adierazita. Horrela ba, finaletik kanpo gelditu zen Erreka lan izugarria egin ondotik. Kontuak kontu, Errekak denboraldian behetik gora egin eta gero, laugarren postua harro egoteko modukoa da eta dudarik gabe, hemendik indarberritua aterako da taldea. Bertzetik, Errekako kadeteak hirugarren gelditu dira kadete mailako Ligan. Lehen bi partidak Anaitasuna eta San Antonioren kontra galdu ondotik, BM Uharteren kontra irabazi egin zuten eta horrela hirugarren postua lortu. Etorkizuna bermatua dagoenaren seinale.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.
Egin TTIPI-TTAPAren lagun