Migel Indurain Fundazioak urtero-urtero Nafarroako kirolari afizionatu onenei eta entrenatzaileei banatzen dien bekak eman zituen apirilaren 24an Gorraizko jauregian. Migel Indurain bera izan zen ekitaldian, bertze hainbat agintarirekin batera. Guzira 231.451 euro banatu ziren.
Eskualdeko kirolariei dagokienez, kirol olinpikoetan eta kategoria absolutoan Niko Mindegia eskubaloi jokalari doneztebarrak 2.000 euro hartuko ditu, 2012ko Europako txapelketako prebian parte hartzeagatik; Agurtzane Obregozo errugbi jokalari iruritarrak 3.000 euroko beka berezia jasoko du, Europako txapelketan bigarren izateagatik eta tiro olinpikoan aritzen den Itsaso Fagoaga lesakarrak 2.000 euroko beka berezia, Munduko eta Europako txapelketan parte hartzeagatik. Junior kategorian, berriz, triatloian, 1.500 euroko laguntza jasoko du Leitzako Judith Saizar kirolariak, Europako txapelketan laugarren izateagatik.
Kirol teknikariei ematen zaien dirulaguntzei dagokienez, Antonio Fagoagak 500 euro hartuko ditu Itsaso Fagoaga entrenatzeagatik. Programa berezien baitan, 22.000 euro laguntza emanen zaie federazioei, 12.000 euro pilota federazioari eta 10.000 kirol egokituen federazioari.
DATUA
9.000 EURO hartuko dituzte eskualdeko kirolariek eta entrenatzaileek.