EPELek antolatutako eskuz binakako pilota txapelketa nagusiaren finalean ez da eskualdeko pilotaririk izanen, bai ordea bigarren mailakoan. Aurreko koadroetan, Mikel Olazabal aresoarra eta Jon Jaunarena leitzarra izanen dira aurrez aurre larunbatean Labriten.
Aresokoak, Iñaki Larrinaga bizkaitarra izanen du lagun atzeko koadroetan. Leitzarrak, berriz, Cecilio Valgañon errioxarra. Asteazkenean aukeratu zuten apirilaren 28an, larunbatean Labriten jokatuko den finalerako materiala.
Ligaxkan jokatutako bi partidak Jaunarenak eta Ceciliok irabazi dituzte eta horregatik, Olazabalek urdinez aterako den bikotea jo du faboritotzat. Jaunarenak, aldiz, Aurrera pilota eskolan aritzen zirenean, beti Olazabalek irabazten ziola aipatu du, «handixeagoa zelako». Baina orain biak handitu egin dira eta ikusi beharko da zer gertatzen den larunbateko finalean.
Jendetza espero da Labriteko jaialdian, Areso eta Leitzatik zale asko mugiaraziko baitituzte. Gainera, 17:45ean hasiko den jaialdiko lehen partidan Aimar Olaizola eta Irujo izanen dira aurreko koadroetan.