Aurten ere ederki moldatu dira eskualdeko gaztetxoak Nafarroako Herri Kirol Jolasetan. Jokoan zeuden bortz txapeletatik, bat ekarri dute Basaburuakoek eta bigarren, hirugarren eta laugarren postuak ere eskuratu dituzte. Sailkapen orokorra apirilaren 1ean Igantzin jokatutako azken jardunaldian erabaki zen.
Kimuen mailan, Baztango Basaburuak eta Igantziko Abelu eta Unanu taldeek parte hartu dute eta horien artean, Basaburuak eta Abeluk lortu zuten hilabete hasieran Igantzin jokatu zen finalerako txartela. Andra Mari (Etxarri Aranatz) eta Sanduzelairen (Iruña) gibeletik, Basaburua eta Abelu sailkatu ziren, hirugarren eta laugarren postuetan, hurrenez hurren.
Haurren kategorian, proba konbinatuetan Basaburuak lortu zuen lehendabiziko postua, eta sokatiran bigarren sailkatu zen.
Kadeteen mailan, berriz, Berako taldea bigarren izan zen eta hirugarren Basaburua. Sokatiran, aldiz, laugarren postuan gelditu zen Basaburua, eta Berako taldeak, puntu erdiagatik, ez zuen finalerako txartelik eskuratu.