Master edo beteranoen mailan aritzen diren txirrindulariekin, Transportes Bidasoa Master Txirrindularitza Taldea sortu dute aurten, senior, master 30, master 40 eta master 60 mailetan aritzen direnekin, hain zuzen. Bederatzi txirrindularik osatzen dute taldea: Luziano Mitxelena (Lesaka, master60); Joxe Anjel Mitxelena (Lesaka, master 40); Iñaki Villoria (Irurita, master40); Ricardo Martinez (Funes, master 30); Ibon Urtiaga (Betelu, master 30); Jabier Urtiaga (Betelu, master30); Mikel Arburua (Igantzi, master 30); Xabier Aranguren (Igantzi, master 30); Ion Zeberio (Legazpi, senior). Master mailako lasterketak, 80-110 kilometro ingurukoak izaten dira, adinaren arabera kilometro gehiago edo guttiago.
Taldea aurten hasi da lanean eta maila ona ematen ari da: Tafallan zein Gorraitzen bigarren eta hirugarren postu bana lortu zuten eta Tafallan taldeka lehenbizikoak izan ziren. Bizkaiko Itzulian zazpigarren postua ere lortu zuten eta Nafarroako Kopan bi lidertza sendo mantendu dituzte, master 40 eta 60 mailetan. Aitzinera begira, master mailako probak gero eta ugariagoak direnez, Euskal Herrian, Aragoin, Kantabrian eta Gaztela Leonen antolatutako egun barreko lasterketetan parte hartzeko asmoa dute. Dena den, probarik garrantzitsuenak Nafarroako Kopa, Itzulia eta Txapelketa eta Euskal Herriko Txapelketa dira eurentzat.
Taldearen aurkezpena, berriz, martxoaren 31n egin zuten. Igantzin arropa berriekin argazki batzuk atera zituzten eta ondotik, Berara joan ziren Transportes Bidasoako egoitzara, han ere argazki batzuk ateratzeko. Gero, Beratik atera eta Baztan aldean barna 110 kilometroko ibilbidea egin zuten eta Igantziko Biltokin bazkalduz borobildu zuten goiza. Taldearen babesle diren Transportes Bidasoa eta Bodegas Iñurrietako ordezkariekin eta Biltokiko kideekin bazkaldu zuten.