Ezkurrako mapa egiten ari den Xabier Tabernaren laguntzari esker, herritarrentzako ezezagunak ziren aztarnen berri jakin ahal izan da. Alde batetik, Olegi aldean, Iruñarri aldera doan bidea utzita eta harrespil edo cromlecharen eskuinean, beste bi ere badaude, sasi artean baina ondo seinaleztatuak.
Bestalde, Arbea inguruan ere trikuharri zoragarri bat dago. Eratsungo lur eremuan dago, baina harat joateko Ezkain eta Erakurriko bidetik barna jeitsi behar da. Mikeleneko borda ezkerrera utzita, kilometro pare batez aurrera egin behar da, eta Pilota Sorora doan bidearen ia amaieran dago trikuharri hori, 100 metro ezkerretara, bidetik kanpo eta ongi seinaleztatua. Hortik pixka bat aurrerago beste bat ere badago. Merezi du ikustera joateak. Ezkaingo zelaigunetik ordu bat behar da oinez hara ailegatzeko.
Ibilaldi baterako gonbidapena
Errotaren inguruan ere paseo bat egin daiteke. Ez dago sobera egoera onean, baina atzeko aldera joanez gero, presatik ura nola sartzen den eta errekatik ura hartzen zuen kanala ikus daitezke. Aurrerago, zirkulu itxura duen borda batek arreta piztuko dizue, eskualdean forma hori duen kasu bakarra izanen baita.
Hortik hurbil, ermitatik jeisten den errekaren ondoan, kobazulo txiki bat ere badago, eta tradizioaren arabera, altura txikiko gentileak hor bizitu ziren. Tornainea baserrirako bidea igoz, eta erreka aldera aurrera eginez, tamaina haundiko gaztainondoak ere ikus daitezke, herritarren arabera, 400 urte izan behar dutenak. Hiru kisulabe ere badira, eta horietako bat egoera onean, gainera, egurrezko zubi batetik pasatuta. Ibilaldi hau ur-jauzi batean amaitu daiteke.