Hasi da pala txapelketa, eta jendea sumatzen da frontoian, gizenkiak kendu nahian edo. Hamar parek eman dute izena, hondarreko. Batzuk kanpoan gelditu dira, gauza bat edo bestea dela medio, eta, neskarik ez baita apuntatu, final bakarra izanen da sanjoanetan. Bosteko bi taldetan daude banatuak pilotariak, eta ligaxka modura jokatuko dituzte launa partida, apiriletik garagarrilera. Talde bakoitzeko lehenbiziko biek semifinalak jokatuko dituzte, sanjoanak aurrean. Herritik hiru pareja atera dira, hirurak anaiak, eta gero, bi misto daude: saldistarrak eta eratsundarrak. Urroztik, berriz, lau lagunek eman dute izena, eta Zubietatik eta Oronoztik, beste bik. Ortzirale guzietan, bi partida izanen dira, eta batzuetan, baita hiru ere. Binako guziei tokatuko zaie bi ortzirale segidan jokatzea.
Jendea biltzeko aitzakian prestatu dute txapelketa, eta herriko giroa pixka bat bixitzeko; orduan, antolatzaileek eskatu dute saiatzeko partidak ortzirale arratsaldeetan jokatzen. Ortzirale honetako, apirilak 20, partidak: 19:00etan, Xabier eta Imanol, Xubeldi anaien kontra. 20:00etan, Antton eta Urko, Danbolineneko anaien kontra, eta 21:00etan, Melo eta Joseba, Josuren eta Alainen kontra. Apirilaren 27an, berriz, Melo eta Joseba, Markel eta Mikel Mikelengo lehengusuen kontra, eta 21:00etan, Joseba eta Ibai eta Urrutia anaiak.