Bardoak 2012 Nafarroako Taldekako Bertsolari Txapelketak martxoaren 31n Leitzan jokatu zen finalarekin borobildu zuen bi hilabetetako ekimena. 500 bertsozale elkartu ziren Leitzako pilotalekuan hiru talde finalisten lanaz gozatzeko eta hasiera hasieratik giro ezin hobea nagusitu zen.
Taula gainean ziren hiru taldeek, Lesakako Rimak Exkaxkok, Etxarri Aranazko Bilixkorrikok eta Oronoz/Malerrekako Erauntsik lan bikaina osatu zuten. Rimak Exkaxko taldeak irabazi zuen arren, parte hartzaile eta bertsozale guztien festa handia izan zen. Taula gainean bertsotan, bederatzi bertsolari; Rimak Exkaxko taldetik Iñigo Olaetxea, Estitxu Fernandez eta Eneko Fernandez. Bilixkorriko taldetik Eneko Lazkoz, Joseba Beltza eta Alain Iriarte eta Erauntsi taldetik, Iker Gorosterrazu, Alazne Untxalo eta Amaia Elizagoien. Bertsolari beteranoak batzuk, hasi berriak edo aspaldian bertsotan jardun ez direnak bertze batzuk.
Taldeka egindako hasierako agurrek umorea izan zuten ardatz, dantza, antzerki, mozorro eta kantu ezagunen bertsioekin. Bertsolariek ez ezik, taldekide guztiek parte hartu zuten agurrean eta publikoak gogotik gozatu zuen. Ondotik egindako lanak ere txukun eta maila onean osatu zituzten bederatzi bertsolariek.
Lasarte gogoan
Saioa bukatzeko, berriz, duela gutti zendutako Manuel Lasarte bertsolari leitzarrari omenaldia egin zitzaion. Leitzako bertso eskolako gaztetxoek eta Migel Mari Elosegi Leitzako bertsolariak bertso bana kantatu zituzten eta ondotik, Jaione Olazabal Aresoko abeslariak Lasartek idatzitako pare bat bertso sorta kantatu zituen, bertsozaleen gozamenerako.
Jai giro ederrean eman zitzaion bukaera finalari, talde finalisten parte hartzaile guztiak taula gainera igo zirenean eta bederatzi bertsolariek bukaerako agurrak kantatu zituztenean.
Saioaren ondotik, bildutako bertsozaleekin triki poteoa egin zen Leitzan barrena eta eskoletako jantokian antolatu zen herri afariak eman zion amaiera Bardoak 2012 ekimenari.