Jalgi Hadi Garaipenera gazte mugimenduak antolatutako Gazte Martxarekin 2.000 gaztek bat egin zuten. Euriak ere ez zituen zapuztu apirilaren 6tik 8ra Nafarroako Konkistaren 500. urteurrena gogoan antolatutako ekitaldiak.
Saran abiatu zen Gazte Martxa, apirilaren 6an, eta bildutakoek ongi pasatu bidenabar, sormenerako eta ezagutzarako aukera ere izan zuten. Biharamunean oinez Lesakarako bidea hartu zuten, tartean Beran bazkalduta. Arratsaldean ailegatu ziren Lesaka. Hemen ere ez zen animaziorik falta izan, eta ekitaldian euskara, lurraldetasuna, feminismoa eta gazte borroka izan ziren ardatz nagusiak. Aipatzekoa da, Irlanda, Eskozia eta Herrialde Katalanetako gazte ordezkariek ere parte hartu zutela. Gauean kontzertuak eta giro ederra izan ziren eta apirilaren 8an Independentistak Sareak deituta Iruñean egin zen Aberri Egunera joanez eman zuten bukatutzat martxa.