Nafarroan aurten eginen diren mendi martxen egutegiak zehaztuak daude. Dagoeneko horietako batzuk eginak ere badira, Corella eta Altsasukoa kasu. Baina oraindik ere badira gehiago, eta tartean daude eskualdeko lau: bi urtetik behin egiten diren Arantza eta Lesakako mendi itzuliak eta urtero egiten diren Baztangoa eta Aresokoa. Ekaitza Elkarteak antolatutako Arantzako Mendi Itzulia maiatzaren 20an eginen da. 30 kilometroko itzulia izanen da, bi kilometro gehiago egiteko aukerarekin.
Baztango Mendigoizaleek antolatutako Baztango XIX. Mendi Itzulia Amaiurren eginen da aurten, maiatzaren 27an. 35 kilometroko ibilbideak 2.000 metroko desnibela izanen du.
Lesakakoak hartuko dio Baztani lekukoa eta ekainaren 17an eginen da Beti Gazte Elkartearen eskutik Lesakako XI. Ibilaldia. Bi ibilbide izanen dira aukera: 21 kilometrokoa (1.100 metroko desnibela) edo 33 kilometrokoa (1.700 metroko desnibela).
Aresokoa, irailaren 2an eginen da. 26 kilometroko ibilbidea egin beharko dute mendizaleek, 1.200 metroko desnibela duen itzulia.