Bidasoa eta Urumea ibaietako arroak modu bateratuan kudeatzeko mugaz gaindiko Bidur proiektuaren bukaerako mintegia egin zen martxoaren 21ean Beran.
Proiektuaren bidez, Bidasoa eta Urumea ibaietako arroen kudeaketaren alderdiak metodologia bera erabiliz aztertu dira, bi ibaiek antzeko ezaugarri ekologiko eta hidrologikoak baitituzte. Bidur proiektuak Pirinioen bi aldeetan uraren kudeaketa integralaz arduratzen diren entitate publikoen partehartzea bultzatu du, ezagutzak trukatuta, berrikuntza-neurriak zabalduta eta bi ibai-arroetan inplikatutako sektoreen artean lankidetza bultzatuta.
Proiektuaren aurrekontua 2.344.077 eurokoa izan da. Kopuru horren %65 Europar Batasuneko Eskualde Garapeneko Europako Funtsak diruz lagundu du, eta gainerakoa proiektua garatzeaz arduratu diren hiru erakundek: Nafarroako Ingurumen Kudeaketa, Haztegiak eta Birpopulatzeak sozietate publikoak –Nafarroako Gobernuko Landa Garapen eta Ingurumen Departamentukoa–; Gipuzkoako Aldundiko IKT Nekazal Ikerketa & Teknologiak eta Pirinio Atlantikoetako Kontseilu Orokorraren Ingurumen Zerbitzuak.
Bidur proiektuarekin, Bidasoa eta Urumea arroen uraren eskuragarritasuna aztertu da, bai lur gainekoa, baita lur azpikoa ere. Bertze hainbat azterketa ere egin dira, erreken ekosistema egokia mantentzeko uraren kuadeaketa jasangarria duen modeloa bilatuz.
Baztan-Bidasoaldeko zenbait herritan ur-hornidura arazoak izaten dira, baina Bidur proiektuak emaitza onak lortu ditu. 275 ur guneren inbentarioa egin da, horietatik 243 lur azpikoak. Gaur egun 218 gune erabiltzen dira ur hornidurarako eta horietatik 184 iturriak dira. 12 zundaketa egin dira (sei Beran eta bana Lesaka, Donamaria, Irurita, Elizondo, Urdazubi eta Zugarramurdin) eta gizakiak edateko moduko ura topatu dute Lesaka, Donamaria eta Iruritan. Lesakakoa aipagarria da, lur azpian 50 metrotara, segundoko 50 eta 200 litro arteko emaria duen ur gunea topatu baitute.