Irteerak, hitzaldiak, ikastaroak, txapelketak... Gisa guztietako ekimenak antolatzen dituzte Arkupeak jubilatuen elkartean. Apirilaren 11n, erraterako, Ordiziako merkatura eginen dute bisita, eta biharamunean, apirilak 12, Soinketa Eguna eginen dute Berako kiroldegian. 12:00etan hasiko da soinketa erakusketa eta 14:15 aldera bazkaria izanen dute Zubiondo jatetxean. Arratsaldez dantzaldia izanen dute. Ez dira hauek apirileko ekimen bakarrak izanen. Izan ere, apirilaren 17tik 25era Andaluzia aldera joanen dira.
Ez da guttiagorako izan martxoa. Xabierko Gaztelura eta Olitera irteerak, hitzaldiak eta bertzelako saioak ere egin dituztelako. Mus txapelketa da horren adibide.
Eguna horretarako hartuta, goiz-arratsaldez musean aritu ziren Arkupeak-eko bazkideak martxo hondarrean. Otsailean herriz- herri jokatutako txapelketetatik sailkatu zirenak aritu ziren eta txapela Leitzara joan zen, Angel Arrizurieta eta Josefina Matxainek irabazi zuten. Txapela eta Iñurrietaren sei ardo eraman zituzten. Bigarren sailkatu zirenak Iruritako Joxe Arraztoa eta Norberto Irureta izan ziren (hiru ardo); hirugarren postua Urrozko Juanito Iribarren eta Marcos Juanenarentzat izan zen eta laugarrena Angel del Moral eta Pedro Urriza elizondarrentzat. Bi bikote hauen kasuan, bakoitzak bi botilako lotea jaso zuen.