1805ean egin zuten errota berria, zaharra zegoen lekutik goitixeago. Eta handik hiru urtera, 1808an, presa berria. Horrek esan nahi du presa bota zutelarik, 2009an, 201 urte zituela, hau da, berrehun eta bat urte zituela. Hala heldu da paper zahar horietan.
Errota berria hiru iturendar maisuk eta sei langilek egin zuten; horretarako, orduko Jurdaneko nagusiak, Juan Martin Etxekonaneak, bere gain hartu zituen errota egitekoan gerta zitezkeen arriskuak, eta etxea paratu zuen fiantzan. 850 peso kostaria da errota, eta 19.858 erreal, berriz, presa; ez jakin zenbat diru zen hori orduko jendearentzat; gutxi ez.
Presa egiteko, Orreagako arkitekto bat behar izandu zuten, eta hiru ezkurrar maisuri enkargatu zieten lana. Napoleonen garaiak ziren, garai nahasiak. Frantziak Espainia hartu berri zuen, indarra eta diplomazia ibilita, eta Euskal Herrian aukera ttiki bat izandu omen zen, Frantziako Errepublikaren barrenean, zazpi probintziek bat egiteko. 1808ko Saldiasko presaren paper horietan eskribitua ageri da Espainiaren eta Frantziaren arteko iraultzarik ez bada aurrera segituko dutela presa egiteko lanetan.
Herriko lagun batek eman dizkigu errotaren gaineko argibideak eta hura egin zuteneko agirien kopiak; eskerrik aunditz hari.