2011ko azaroaren 5 eta 6an, Nafarroa, Gipuzkoa eta Lapurdin izan ziren euriteek kalte haundiak eragin zituzten. Eta kalte horien inguruan, udalen eskaerei Nafarroako Gobernuak ez diela erantzunik eman salatu dute Mendialdeko udalek, eta gaineratu dute, prentsa bidez jakin dutela 88.782 euroko laguntza izanen dutela, kalteak 471.000 eurotan baloratu diren bitartean.
Egoeraren berri emateko, agerraldia egin zuten inguruko hainbat udal ordezkarik martxoaren 16an. Zehazki, Baztan, Leitza, Lesaka, Lakuntza, Goizueta, Igantzi, Etxalar, Uharte Arakil eta Aresoko udalek sinatutako idatzia agertu zuten eta gehiagok babesa adierazi diete: Bera, Basaburua, Betelu, Arantza, Larraun, Etxarri Aranatz, Iturmendi, Arbizu, Altsasu, Urdiain, Bakaiku, Olazti, Ergoiena, Arruazu, Irañeta, Ihabar, Lekunberri, Arakil, Irurtzun eta Imotzko Udalak.
Prentsaurrekoan azaldu zutenez, «eremu hauek jasan zituzten kalteen neurriak Espainia eta Frantziako Gobernuek estatu mailako laguntzak jaso ahal izateko hala eskatu zuten lurraldeak eremu katastrofiko bezala izendatzea ekarri zuen. Horrela gertatu da bai Gipuzkoa eta bai Iparraldean ere. Nafarroako kasuan bereziki ipar-mendebaldean kokatuta dauden udalerriei eragin zien euriteak eta orain arte herri hauetan izandako kalteei ez zaie inolako erantzunik eman Nafarroako administrazioaren partetik». Lau hilabete baino gehiago igaro direnean mendialdeko udalek adierazi dute «orain artean izan ditugun bileretan ez zaiela inolako erantzunik eman gure eskaerei».
Bilerak Gobernuko hainbat sailekin egin dituzte (tokiko administrazioa, ura eta ingurugiroa, abeltzaintza azpiegiturak…) baina «inork ez du bere gain hartu sortutako kalteei erantzuteko ardurarik eta oro har erantzun orokorra ardurak bertze leku batzuetara desbideratzea izan da, azken finean egoerak sortu duen karga guztia Udalen gain utziz». Udalen arabera, «alde batetik, kalteak hainbertzerako ez direla izan esan zaigu, baita gisa honetarako larrialdiei aurre egiteko dirurik ez zegoela ere». Hala, kaltetutako udalek argi utzi nahi izan dute «jasan ditugun kalteak haundiak eta esanguratsuak izan direla ditugun baliabideentzat, eta administrazioak ezin duela bertze alde batera begiratu». Horrez gain, Parlamentuan emendakin bidez kaltetutako herriei laguntzeko atal bat osatzeko eskaera atzera bota izana ere kritikatu dute. «Larrialdietarako dirurik ez dago horrela erabaki delako, eta are salagarriagoa dena ez dugu kaltetutako herriei laguntzeko borondaterik ikusi». Egoera aztertu ondotik, Baztan, Leitza, Lesaka, Lakuntza, Goizueta, Igantzi, Etxalar, Uharte Arakil eta Aresoko Udalek bilera bat eskatu zuten Gobernuko lehendakariarekin arazoa bideratzeko asmoz.
Erantzuna prentsa bidez iritsi zaie, martxoaren 7an jakin baitzuten 88.782 euroko laguntza onartu dela kaltetutako herrien artean banatzeko. Kontuan izanda jasandako kalteak 471.000 eurotan baloratu direla, «diru kopuru hori nabarmenki ez da nahikoa, eta ez du inondik inora konpondu beharreko azpiegiturak konpontzeko biderik ematen», diote udal ordezkariek. Eta gaineratu dute, udalek jasandako kalteen %82ari beren kabuz egin beharko diotela aurre, eta Gobernuaren ekarpena «bere irudia garbitzeko keinu hutsa bertzerik ez dela, zurikeria politikoa ‘Iparraldeko nafarretaz’ gogoratzen dela adierazteko».