Udalak deituta, martxoaren 4an herri batzarra egin zen eta 34 lagunek erantzun zioten deialdiari. Presa jeistea eta Udalak herritarrendako bainuetxearekin sinatu duen akordioa izan ziren aipatu ziren puntuak. Bi gai hauek izan ziren jendeak interes gehienarekin solastu zituenak.
Presaren inguruan, Kantauriko Ur Konfederazioak presa botatzeko erran zuen, baina Udalak presa osorik bota beharrean metro bat eta erdi jeistea eskatu zion, eta udan putzua egiteko metro eta erdi hori ixten uzteko, bainatzeko lekua izandu delakoz betidanik. Izan ere, pena izanen litzateke herritarrentzat, eta zorionez, Udalaren proposamenari baiezkoa eman dio Ur Konfederazioak.
Interesa piztu zuen bertze gaia bainuetxeak herritarrei egindako eskaintza izan zen. 16 urtetik beitiko gazteek eta haurrek sarrera dohainik izanen dute, eta 16 urtetik goitikoek sei eurotan izanen dute ordu bateko zirkuitua. Prezio erdian izanen dute, normalean, zirkuitu hau 12 eurotan baitago.
Txartel hau eskatzeko herrian erroldatua egon behar da. Eskatzen duenari txartela emanen zaio eta txartel horrekin batera, bainua hartzera joatean, baliteke nortasun agiria eskatzea ziurtatzeko. Horrez gain, txartel honekin bertze masaje eta tratamenduetan ere beherapenak izanen dira, %10 eta %15 artekoak, hain zuzen. Gainera, hotel honen katean dauden bertze lekuetako hoteletan txartel honekin deskontuak izanen dira.
Bertze gai batzuk ere landu ziren, nahiz eta gai batzuei tratatzeko eta informazioa sartzeko epe luzeagoa eman.
Hasieran erran bezala, 34 lagun bildu ziren batzarrean. Eta igandea zela eta zein ordu zen kontuan hartuta, nahiko jende etorri zen.