Martxoaren 26rako ateraldia antolatu dute Pulunpa eskolakoek. Gipuzkoa aldera joanen zaizkigu neska-mutiko eta irakasleak. Bi taldetan banatuko dira: alde batetik, Haur Hezkuntza eta Lehenbiziko Ziklokoak goizean Donostiako Aquarium eta Txikiparkera joanen zaizkigu eta bertzetik, bigarren eta hirugarren ziklokoak Pasaian geldituko dira goizean. Pasaiatik Pasai Donibanera itsasontzian joanen dira eta gero, museoa (aspaldiko itsasontzien maketak), erakusketa (euskaldunon presentzia baleen arrantzan) eta azkenik, itsasontzien tailerra ikusiko dituzte. Arratsaldean Donostiako Txuri-Urdin izotz jauregira joanen dira.
Migel maisuaren agurra
Aitzineko TTIPI-TTAPAn erran bezala, gure eskolan hainbat eta hainbat urtez irakasle aritu den Migel maisua martxoaren 5ean jubilatu zen. Agur berezia antolatu zuten. Hasteko, irakasle guztiak elkarrekin joan ziren bazkaltzera, eta ondotik, berriz, gisa guztietako sorpresak izan ziren Migelentzat: herriko dantzarieik aurreskua dantzatu zioten, herriko bertsolari eta bere ikaslea izan den Egoitz Gorosterrazuk bertsoa kantatu zion eta pergamino batean oroigarria ere eman zion, argazki bilduma bat eginez muntaia ttiki baten emanaldia ere egin zen, Migelen urte guztietako argazkiak... Akitzeko txokolatada izan zuten.