Bigarrenean bai, bigarrenean lortu du aizkora apustua irabaztea Xabier Mindegiak (Beintza-Labaien, 1984). Aizkorazaleek ongi erantzun zioten demari eta Doneztebeko pilotalekua betea zela, Julen Kañamaresen (Berriozar, Nafarroa) aurka apustua jokatu zuen otsailaren 19an. Baita irabazi ere. Minutu eta 23 segundoko alda atera baitzion Beintza-Labaiengoak aurkariari.
Aizkolari bakoitzak hamar pago-enbor moztu behar izan zituen: zortzi kanaerdiko eta bi oinbiko. Bi oinbikoak eta bi kanaerdiko Berriozarkoak eraman zituen eta gainerakoak Mindegiak, aitzinetik hitzartu bezala. Eta alde bakoitzak 3.000 euro paratu zituen jokoan.
Biek egin zuten lan ederra, baina beharbada, Mindegia erregularragoa izan zen. Hasieran, Mindegiak berak espero bezala, aurkaria aitzinean jarri zitzaion, baina denborarekin berak hartu zion aurrea. Halaxe egin zuen akitu arte, aita eta anaiaren aginduei fin segituz. Lan guztiak akitzeko 32 minutu eta 22 segundo behar izan zituen Beintza-Labaiengoak eta 33 minutu eta 45 segundo Julen Kañamaresek.
SAIOA AKITUTA
«Hasieran, bera guk pentsatu bezala hasi da, oso indartsu, eta tarte apur bat atera digu; baina niri aitak eta anaiak lasai aritzeko esaten zidaten, harrapatuko nuela, eta horrela izan da. Nik beraien esanei kasu egin diet, eta emaitza oso ona atera dugu»
Xabier MINDEGIA
Beintza-Labaiengo aizkolaria