Asteak dira neguko basozaintza kanpaina abiatu zenetik, Nafarroako Gobernuak basoetan suteak prebenitzeko eta itzaltzeko egiten duen kanpaina hasi zela, alegia. Eta laster bukatuko da horretarako epea. Larreak erretzeko baimenak martxoaren 16ra arte eska daitezke eta erretzeko azken eguna apirilaren 15a izanen da.
Baimenduz gero, bertzeak bertze, hainbat baldintza bete behar dira. Alde batetik, larreak erre behar diren egunean, hurbilen dauden suhiltzaileen parkera deitu behar da, toki horretan erretzea baimendua dagoen ala ez baieztatzeko eta zehazki non erreko den adieraziz. Horrez gain, landareak bakarrik erre daitezke, eta erreka, kuneta eta sakabanatutako zuhaitzetan ezin da erre.
Ordutegia ere aipatzekoa da, erreketa ezin delako 09:00 baino lehen egin eta 17:00etara bukatua egon behar delako. Eta erretzeko momentuan, guttienez bortz lagunek hor egon behar dute sua erabat itzali bitarte.
Basoak erretzeko baimena eskatzea ezinbertzekoa bada ere, oraindik ere baimenik gabe larrei su ematen dietenak badira.