Hotz egiten bazuen ere, herritarrak ez ziren karrikara ateratzeko beldur izan. Ortzegun gizenarekin hasi ziren inauteriak. Landangain eskolako neska-mutikoek herrian barna antzerkiak egin zituzten eta ondotik, musikarekin lagunduta, berendua izan zuten frontoian.
Igandearekin, kinto bazkariak izan ziren eta honen harira, giro polita sortu zen herrian.
Astelehenean, inaute-inaute baserriz baserriko eskea izan zen. Bi auzotan banatuta, 55 lagun inguru ibili ziren eskean gauera arte.
Asteartean, berriz, mozorro eta karrozek herriari itzulia eman zioten eguerdian. Denetarik ikusi ahal izan zen plaza eskinean: pailazoak, mamuak, okupak, txirrindulariak, futbolariak, baserritarrak… Karroza saila ere bazegoen; rally-arena, pintxoena, Asiako liztor beltzarena (erle eta suhiltzaileekin), mendi barbakoarena, mamu harrapariena, sukaldariena... Ondotik, Herriko Ostatuan bazkaria izan zen. Larraburuan ere egin zen bazkaria. 33 lagun inguru bildu ziren eta bazkal ondotik Beñat akordeoilariarekin giro ederrean dantzan aritu ziren.
Arratsaldean, Beñaten akordeoi doinuek lagunduta, taloak izan ziren Herriko Etxe azpian. Lehenengo urtez antolatu da taloen afera hau eta ikaragarrizko arrakasta izan zuen.
Orain, urtebetez esperoan egon beharko dugu berriz ere egun hauek ailegatzeko!