Tiro bat bezala dator Sarako Usopop festibalaren otsaileko Kontrapasa, “Musika berriak eta amalurra” goiburuarekin. Hilaren 25ean, larunbatean Ruper Ordorika, Rover ariko dira Lurberri gelan 20:30etik aitzinera eta Islaia Etxola gaztetxean; ondoren, Aloé Vera DJarekin dantza ainitz luza daiteke. Antolatzaileek diote 2011n jaialdi independentearen bideragarritasuna baieztatu dela, Ipar Euskal Herrian halako proposamenentzat publikoa badela berretsi dutelako.
Etxeko artistak (Joseba Irazoki, M.Botibol) eta Frantziako Estatukoak (Baden Baden, Uncle Jelly Fish) kartel berean elkartuz hasi zen Usopop 2010eko abuztuan. Udako saioarekin gustura geratu eta, uso pasari kontrapasa gehitzea erabaki zuten iazko otsailean, Anari, Panda Valium, Leopold Skin… Eta abuztuan, berriz ere, Moby Dick, Mursego… Ez da bertze edozein kontzertu bezalakoa, inguruarekin errespetua bultzatzen duen ekimena da, bisitariei bertako ekoizleen produktuak eskaintzen dizkiena.