Nafarroako Herri Kirol Federazioak kirol jolasak antolatu ditu bertze urte batez. Martxoaren 4an abiatuko dira Berriozarren eta apirilaren 1era bitarte, herriz-herri proba konbinatuetan eta sokatiran hainbat gaztetxo ibiliko dira.
Martxoaren 4an Berriozarren jokatuko den jardunaldiaren ondotik, martxoaren 11n Sakanan jokatuko da (Arbizun edo Etxarrin), martxoaren 18an Beran eginen da, martxoaren 25ean Altsasun eta apirilaren 1ean Igantzin. Hori izanen da bosgarren eta azken saioa. Aipatu, jardunaldi guztiak 11:00etan hasiko direla.
Parte hartzaileak
Guztira hiru kategoria izanen dira: kimuen mailan (2000 eta 2001 urteetan jaiotakoak) konbinatuetan bakarrik ariko dira eta Berriozar, Igantziko Unanu eta Abelu, Etxarri Aranazko Andra Mari eta Putterri, Altsasuko Iñigo Aritza, Baztango Basaburua, Araitz Beteluko Araxes eta Iruñeko Sanduzelai taldeek parte hartuko dute.
Haurretan (1998-1999an jaiotakoak) konbinatuetan eta sokatiran ariko dira eta Berriozar, Andra Mari, Iñigo Aritza eta Basaburuak parte hartuko dute.
Kadeteetan, azkenik, (1996-1997 urteetan jaiotakoak), Berriozar A eta B, Andra Mari, Basaburua eta Berako taldeek eman dute proba konbinatuetan izena. Sokatiran, horiez gain, Iñigo Aritza ere ariko da. Berako taldeak aurten lehenbiziko aldiz parte hartuko du, baita Sanduzelaik ere.