Euskal Irratiak federazioaren laguntzarekin, helduen kantu xapelketa antolatu du Euskal Kantu Xapelketa elkarteak Iparraldean. Gisa honetara, kantari berrien talentua ezagutarazi eta plazaratu nahi da, ohitura eta euskal kantuaren memoria mantendu eta musikagileak sustatu eta sorkuntza bultzatu ere bai.
Ekainean eginen den Euskal Herri mailako finalerako ordezkariak aukeratuko dira, eta horretarako Iparraldean kanporaketak jokatuko dira. Martxoaren 17a izanen da izena emateko azken eguna: Baxe Nafarroan Irulegiko irratirat deitu behar da izena emateko (05 59 37 14 11-Jone), Lapurdin Gure irratirat (05 59 59 30 01-Miren) eta Xiberoan Xiberoko Botzarat (05 59 28 29 87-Artzen). Izena ematerakoan aukeratutako kantua zein den ere jakinarazi beharko da.
Diskarik plazaratu ez duten 16 urtetik goitikoek parte hartzen ahalko dute, eta hiru kategoria izanen dira: banaka, binaka edo taldeka (15 kide gehienik). Musikarik gabe edo musikarekin lagunduta aurkez daiteke, kanta ezagunarekin edo norberak sortutako batekin.
Finalerdi bakoitzean publikoaren sariaz gain, maila bakoitzeko bi lehenbizikoak izanen dira sarituak, eta hortaz aparte, bertzelako sariak ere izanen dira: ahots hutseko saria, sorkuntza saria, publikoarena, interpretazio onenaren saria, berezitasunarena eta musika antolaketa onenarena.