Elurra, horma eta hotza. Otsail hasierako eguraldiaren ezaugarriak horiexek izan dira. Termometroak aspaldiko tenperaturarik baxuenera ailegatu baitira.
Azken hamar urteotako datuei erreparatuz, 2005eko otsailaren 28an neurtu zen tenperaturarik hotzena Gorramendin, 12,7 gradu zeropetik. Aurtengo otsailaren 3an, aldiz, zero azpitik 12,8 gradu neurtu zituen estazio meteorologikoak. Egun hori izan zen aurtengo orain arteko hotzena, eta minimoak ez ziren zero gradutara ere ailegatu. Leitzan eta Areson ere aski tenperatura baxuak neurtu ziren, 9 eta 9,5 gradu zero azpitik, hurrenez hurren.
Otsailaren 7a ere aski hotza izan zen. Gorramendin, adibidez, 11,4 gradu zero azpitik neurtu ziren, eta Amaiur, Irurita eta Leitzan zazpi gradu zeropetik. Eta bide beretik joan zen otsailaren 8a ere. Gorramendin 12,7 gradu zero azpitik neurtu ziren, eta Leitzan, berriz, zazpi gradu zeropetik.
Bertzetik, aipatzekoa da, hezetasuna eta haizea kontuan hartuz, sentsazio termikoa are baxuagoa izan zela egun horietan. Adibide bat emate aldera, otsailaren 8an, Gorramendin 19 gradu zero azpikoa zen.
Goiko taulan otsailaren 3an eta 7an eskualdeko estazio meteorologikoetan neurtu ziren tenperatura maximo eta minimoak ageri dira.