Hotzari eta elurrari gogor egin, eta otsailaren 4an eta 5ean inauteriak ospatu ziren Gaztelun. Mota guztietako mozorroak ikusi ziren: piratak, printzesak, pailazoak, oiloak, polizia eta presoa... Elurra eta tenperatura hagitz baxuak izan ziren, baina primeran joan ziren.
Larunbat arratsaldean, etxez-etxe pusken bila ibili ziren Maialen, Leire eta Maitane trikitilariekin, eta etxe batzuetan ohiko geldialdia egin eta merendu ederraz gozatu zuten. Lerro hauen bidez, eskerrak horregatik.
Gauean, berriz, afaria egin zen eta 45 bat lagun elkartu ziren, festa igande goizera arte luzatuz. Igandean, bazkaria eta afaria egin ziren.
Otsailaren 19an, bazkaria eta afaria egitekoa zuten gaztetxoak sobratutako puxkekin.