Erremontezaleek bi hitzordu eder izanen dituzte otsailaren 16an. Ortzegun arratsaldeko 16:00etan hasita Hernaniko Galarretan lau partidako jaialdia izanen da. Tartean, Sagardoaren txapelketaren barrenean, iaz txapeldun izan ziren Juaristi eta Patxi Olazar doneztebarra, Koteto Ezkurra eta Aritz Zubiri goizuetarraren kontra ariko dira. 19:30ean Labriten, berriz, Migel Mari Urrutiak bere azken partida jokatuko du.
Galarretako jaialdiari dagokionez, Sagardoaren Txapelketako partida bakarra jokatuko da, jaialdiko bigarrena. Bertan, joan den urtean ustekabean txapeldun suertatu ziren Juaristi eta Patxi Olazar doneztebarra, Koteto Ezkurra doneztebarraren eta Aritz Zubiri goizuetarraren kontra ariko dira, A multzoko lehen partidan. Goizuetarrak maila honetako lehen partida jokatuko du, baina aitzinean txapeldun handia izanen du lagun. Gainera, koadro osoan azken urtean gehien hobetu duen erremontelaria da goizuetarra, langilea eta hutsegite gutti egiten duena. Aitzinean, bikote orekatua izanen dute, joan den urteko txapelarekin erakutsi zuten bezala.
Galarretako jaialdiko lehen partidan, Juanmartiñena eta Agirrezabala, Urrutia II eta Urkoren kontra ariko dira, 35 tantura.
Sagardoaren Txapelketako partidaren ondotik, Uterga eta Etxeberria III, Matxin III eta San Migelen kontra ariko dira, 40 tantura.
Azkeneko partidan, Etxeberria IV eta Aizpurua II, Agirresarobe eta Barrenetxea IV.aren kontra ariko dira, 30 tantura.
Urrutiaren azkena Labriten
Galarretan despedida egin ondotik, frontoi laburrean ere azken partida jokatuko du Migel Mari Urrutia saldiastarrak, Mexikora joan aitzinetik. Ortzegun arratsaldeko 19:30ean izanen da hitzordua. Endika lehengusuarekin bikote eginez, Gorka Urtasun eta Iñaki Lizasoren kontra ariko da.