Otsailaren 19an Julen Kañamaresen kontra aizkora apustua jokatuko du Xabier Mindegiak (Beintza-Labaien, 1984) Donezteben. 12:00etatik aitzinera, aizkolari bakoitzak zortzi kanaerdiko eta bi oinbiko moztu beharko ditu. Alde bakoitzak 3.000 euro jokatuko ditu eta desafioa Nafarroako Herri Kirol Federazioak kontrolatuko du. Dopinaren kontrako proba ere pasatu beharko dute. Beintza-Labaiengoarentzat bigarren desafioa izanen da eta apustuaren atarian, nola dagoen jakin nahi izan dugu.
Ikusmin haundia piztu du aurtengo lehenbiziko aizkora apustuak, nahiko parekatua izan daitekeela baitiote iragarpenek. Xabier Mindegiak eta Julen Kañamaresek (Arostegi, 1989) jokatuko dute, beintzarrak egindako deiari Kañamaresek baiezkoa eman zion, eta hitzordua otsailaren 19an egin dute Donezteben, 12:00etan.
Apustuaren atarian, entrenamenduetan burubelarri topatu dugu Mindegia. «Asko» entrenatzen ari dela aitortu digu, «besterik ez dut egiten, lana, entrenatu eta lo», dio irribarrez. Eta eguna ailegatu arte ez omen du besterik eginen. Desafioa dela eta, ez omen dago urduri, nahiz eta «buruan beti pentsamendu horrekin» dabilen. Ez da guttiagorako. Izan ere, alde bakoitzak 3.000 euro paratu ditu jokoan, eta zortzi kanaerdiko eta bi oinbiko moztu beharko dituzte. Bi oinbikoak eta bi kanaerdiko Kañamaresek eramanen ditu plazara eta gainerakoak beintzarrak. Halaxe adostu baitzuten apustua hitzartu zutenean. Bere egurrak nolakoak izanen diren galdetzera ez gara ausartu. Are gehiago, galdetu gabe, ez duela erranen erantzun digu. Beraz, eguna ailegatu bitarte sekretua. Aurkariaren egurrak nolakoak diren ere ezin izanen dugu aurretik jakin, baina Mindegiaren irudiko, «onak izanen dira».
Bere bigarren apustua izanen du Beintzako gazteak, lehenbizikoa Otañoren aurka jokatu baitzuen orain urte batzuk. Orduan ezin izan zuen irabazi, baina aldi honetan bi aizkolariak «berdintsu» ikusten ditu: «halere, egur haundiekin pixka bat deskuidatuko den itxaropena badut».
Gainerakoan, apustua dela eta, denetarik somatu du inguruan: «batzuk hainbeste diru jokatuta harrituak daude, beste batzuek ez duela merezi diote, baina batzuk animatu egiten naute».
Pilotatik aizkorara
Etxean aizkora beti ezagutu duen arren, 16 urte bete arte ez zuen kirol hau probatu Mindegiak. Ordura arte, esku pilotan ibili zen: «16 urte bete arte pilotan aritu nintzen eta ez nuela deus egiten ikusita, pilota utzi eta aizkoran hasi nintzen. Pixka bat moldatzen naiz, eta moldatzen naizen bitartean, horrekin segituko dut», adierazi digu. Aizkoran hasi eta berehala nabarmendu zen, probatu zuen urte berean egin baitzuen txapelketetarako saltoa; Nafarroako hirugarren mailakoan, hain zuzen. Martin aita izan zuen irakasle.
Gaur egun, berriz, aizkoraz aparte lanean ere badabil eta lana eta entrenamenduak egiteko nola edo hala moldatzen omen da: «lanarekin denbora guttiago izaten da entrenatzeko eta batzuetan ilunduta aritzen naiz, ahal den bezala». Bere asteko martxaren berri ere eman digu: «pare bat aldiz aizkoran aritzen naiz, beste pare bat aldiz mendira joaten naiz eta batzuetan gimnasiora». Zaintzen dela ere kontatu digu, baina...: «juerga utzi dut, baina jatekoa pixka bat gehixeago ere begiratu beharko nuke». Aizkoran ongi moldatzen den arren, aurkari «asko» dituelakoan dago: «ni baino puskaz aizkolari hobeak badira». Eta aizkolari bat aukeratzekotan Donato Larretxea aipatu digu. Plaza, ordea, etxekoa: «Labaiengo plaza».
Apustuak baino nahiago omen ditu txapelketak, «apustuekin pertsona asko estutzen delako». Dena den, orain apustuari heltzea tokatzen zaio eta bere aldetik, hilaren 19an ahal dena egiten saiatuko da. Berea izan zen apusturako ideia eta berea izatea nahi du garaipena ere. Ea bada, gauzak nahi bezala ateratzen zaizkion.
16 URTEREKIN AIZKORAN
«16 urte bete arte pilotan aritu nintzen eta ez nuela deus egiten ikusita, pilota utzi eta aizkoran hasi nintzen. Pixka bat moldatzen naiz eta moldatzen naizen bitartean, horrekin segituko dut»
APUSTUA BURUAN
«Apustua dela eta, ez nago urduri baina buruan beti pentsamendu horrekin nabil. Lana, entrenatu eta lo, besterik ez dut egiten».