Aldi bateko bada ere, erremontea utzi eta emaztearekin Mexikora bizitzera joatea erabaki du Miel Mari Urrutiak. Hura dago atzelarietan hoberexkoena, eta Oriamendi enpresak esana dio ateak zabalik utziko dizkiola. Mexikoko bidea hartzea «erabaki zaila» izan dela aitortu du Urrutiak. Eta zaila izanen zen, urte franko egin baititu erremontean. Duela bederatzi urte egin zuen erremonte profesioalerako saltoa, eta lehenagotik, beste bi urte aritu zen afizionatuetan. «Zaila izandu da erabaki hau hartzea, baina orain hautsi beharra zen, eta, gogorra izandu bada ere, egin nezakeen hoberena da», adierazi du. Halere, ez du baztertu egunen batean berriz erremontean hastea: «Oraindik gaztea naiz, eta ezin da jakin berriz hasiko naizen edo zer eginen dudan. Enpresak ateak zabalik utzi dizkit». Azken partidetako bat Oskar anaiarekin jokatu zuen, Galarretan, eta hagitz berezia izandu zen familia guziarentzat.
Mexikora joanda, bere biziak «erabateko buelta» hartuko duela uste du: «Garbi daukat zer egin behar dudan, eta dena aldatuko da. Orain artino, erremontetik bizitzeko zortea izandu dut, lanik egin gabe, eta orain etapa berria hasiko dut, goizetik lana eginez. Aiherrik nago proiektu berriarekin hasteko». Kirola, ordea, ez du alde batera utzi nahi, eta Mexikon jarraitzeko asmoa du: «Erremontea eta materiala eramanen ditut, eta entrenatzen segituko dut. Etxetik hurbil badut jokatzeko tokia, eta erremontean ariko naiz. Gerora, palan probatu nahi dut, han franko ongi aritzen baitira palaz. Entrenatuta eta kirola eginda ere, txartzea kosta egiten zait eta, deus ere eginen ez banu... Ez naiz geldituko, eta zaindu egin behar dut». Ibilbide berria Mexikoko hiriburuan hasiko du, familiakoek eta lagunek prestatutako agurra jasota.