Joan den urtarrilaren 20an, ostirala, arratsaldeko 8etan eman zitzaien inauteriei hasiera. Trikitixa eta panderoaren soinuarekin, gazteek mozorroturik herriari buelta eman zioten. Ondotik, afaria izan zen Hilarion jatetxean eta musika Herriko Ostatuan.
Larunbatean, goizean gosaldu eta motorra beroturikan, gazteak eguraldiari kontra egiteko herrian barna puxkak biltzen hasi ziren, akordeoiarekin, Frantzisko zen soinujotzailea. Salda eta ardoa eskaini zitzaien eta bi txartel eman zituzten etxe bakoitzean. Ondotik, bazkaria izan zuten Hilarion jatetxean.
Arratsaldez, jende dezente atera zen kalera mozorrotuta. Klase guztietako mozorroak ikusi ziren. Lehiaketa bat ere izandu zen, bi sari banatzeko. Azpimarratzekoa da, neska gazte batzuek egin zuten lana, telebistako programa baten antzezpena egin baitzuten. Oso polita izandu zen. Gero egin zuten zozketa: bi afari Hilarion jatetxean eta bi zirkuitu bainuetxean. Segidan, Herriko Ostatuan berendua izan zen, eta dantzatzeko musika. Giro polita sortu zen. Gauean, berriz, afaltzera joan zen jendea, herri guztiari irekia baitzegoen afaria. Eta bertan urdaiazpikoaren zozketa izandu zen. Afalondoan, musika izan zen Herriko Ostatuan.
Hurrengo larunbatean, urtarrilak 28, mus txapelketa izan zen ostatuan. Eta arratsean, afariaz gain, kontuak egin zituzten gazteek.