Joan den urtean bezala, Gorka Urtasun iruritarrak irabazi du aurten ere erremonteko Martiko Saria. Urtarrilaren 6an Iruñeko Labrit pilotalekuan jokatu zen buruz buruko frontoi laburreko txapelketaren finala eta Iruritakoak 30-22 irabazi zion Julen San Miguel doneztebarrari. Teoriaren arabera, San Miguelen sakea erabakigarria izan zitekeen, baina ez zen horrela suertatu, Urtasunek min gehiago egin baitzuen lehen pilotakadarekin. Gainera, Iruritakoa ongi ibili zen peloteoan eta erreboteatu behar izan zuenean ere ederki moldatu zen. San Miguelek tarteka jokaldi bikainak egin zituen, baina beti gibeletik ibili zen.
Orona Masterra
Orona buruz buruko Masterraren final bikainean Koteto Ezkurrak 30-28 irabazi zion Migel Mari Urrutiari urtarrilaren 7an Hernaniko Galarretan, partida ederra jokatuta. Partida osoa kontrolpean eduki zuen Urrutiak eta beti markagailuan aitzinetik izan zen saldiastarra, 27-26kora arte. Min handia egin zuen Urrutiak sakearekin eta menpean eduki zuen Ezkurra. Azkenean, ordea, Ezkurrak lortu zuen txapela, oraindik ere maisuetan maisu dela erakutsiz.