Bertizko Turismo Partzuergoak sustatutako Bidasoko Bide Berdea Endarlatsa-Doneztebe tartean egokitzea izeneko proiektua udalez gaindiko proiektu sektorial deklaratu du Nafarroako Gobernuak, urtarrilaren 19ko Nafarroako Aldizkari Ofizialean argitara eman zenez. 30 egunez espedientea jendaurrean jarri da eta aldi berean, entzunaldia emanen zaie proiektuak ukitutako lurretako toki entitateei. Endarlatsa eta Doneztebe arteko azpiegiturak 27 kilometroko luzera du eta lau udalerri zeharkatzen ditu, Lesaka, Igantzi, Sunbilla eta Doneztebe. Horixe da proiektua udalez gaindikoa izendatzeko arrazoietako bat. Bertzea, azpiegiturak gizartean izanen duen eragina ukitutako udalerrietako herritarrez haratago doala, «azpiegituraren erabiltzaileak, trenbide zaharrean dagoeneko abian den zatiren batean gertatzen den moduan, Nafarroako zenbait hiri eta herritatik iristen dira, bai eta beste eskuade batzuetatik ere».
Jardueraren onura publikoa eta gizarte interesa arrazoitzeko orduan, Nafarroako Gobernuaren ustez, «ekarpen handia eginen dio biztanleriaren talde handi baten gizarte ongizateari, azpiegiturak ahalbidetuko dituen josteta eta kirol jarduerei esker» eta, aldi berean, azpiegiturak «ostalaritzarekin eta landa turismoarekin lotutako jarduera ekonomikoak ahalbidetuko ditu».