AIOROA, Joakin
Bigarren urtez jokatu den Euskal Herriko ingude-jasotze txapelketa irabazi zuen iturendarrak azaroaren 18an Donezteben, 91 jasoaldi eginda.
AMAIUR
Sokatira taldeak Nafarroako txapel guztiak irabazi ditu, gizonezkoetan nahiz mistoan. Euskal Herriko 4x4 txapelketan, berriz, txapeldun eta azpitxapeldun izan da 300 kiiloz beheitiko kategorian.
ARANGUREN, Xabi
Ez da lasterketa, baina hogeigarren edizioa betetzen zuen La Miguel Indurain proban ibilaldi luzeena osatzen bizkorrena izan zen txirrindulari igantziarra ekainaren 25ean Beran.
ARIZTEGI, Maika
2000.ean irabazi zuen Euskal Herriko koxkor biltze txapelketa lehen aldiz eta urriaren 9an lortu zuen hamekagarrena Asteasun. 2004an huts egin zuen, Aizarnazabal topatu ez zuelako.
ARPANA
Urriaren 1ean Igantzin jokatutako Nafarroako arpana txapelketan Amaia Gartzia eta Nerea Sorondo beratarrak suertatu ziren txapeldun, Lezaungo Ana Lopez eta Itziar Nuñezi 19 segunduko aldera atera ondotik.
BAZTAN F.T.
Baztan Futbol Talde nagusiak Nafarroako Preferente mailara bueltatzea lortu du, denboraldi bikain baten ondotik (30 partidetatik 22 irabazi, 5 berdindu eta 3 galdu zituzten).
BERTIZ, Unai
Nafarroako txapelketa irabazi ez ezik, errekor berri bat ere egin zuen harrijasotzaile sunbildarrak.
BETI GAZTE
Lesakako futbol talde nagusiak Gipuzkoako Ohorezko Mailara igotzea lortu du eta aurten ere denboraldi hasiera bikaina egin du. Futbolean berri txarra Leitzako Aurrerak eman du, Nafarroako Erregionaleko lehen mailara jautsi baita.
DONEZTEBE
Nafarroa eta Euskal Herriko Herriarteko pilota txapelketak irabazi ditu Patxi Ordoki buru duen Doneztebe pilota taldeak. Nafarroakoan Iruñari irabazi zion finala uztailaren 3an Labriten eta Euskal Herrikoan Hernaniri uztailaren 22an Muskizen (Bizkaia).
ERRUGBIA
Euskal Herriko zazpi herrialdetako lehen errugbi txapelketa jokatu zen Saran maiatzaren 28an eta Donapaleu nagusitu zen, finalean Gasteizko Gaztediri irabazita. Sara hirugarren izan zen.
EZKURRA, Koteto
Hamaikagarren aldiz jantzi du erremonteko buruz buruko txapela, hamalaugarren finalean. Irailaren 3an Galarretan 30-22 irabazi zion Migel Mari Urrutia saldiastarrari.
INDART, Iñaki
Desagertutako gazte legasarraren izena hartu du Doneztebeko udal futbol zelai berriak. Kasik zortzi denboraldiz etxeko partidak Taxoaren, Uharten eta Elizondon jokatu ondotik, Doneztebe Futbol Taldea osatzen duten 204 jokalariek azkenean badute herritik mugitu gabe entrenatzeko eta jolasteko aukera. Abenduaren 8an egin zen inaugurazio ofiziala.
IRURITA
Baztan-Errekako laxoa txapelketaren 33. edizioan bere zortzigarren txapala jantzi zuen Iruritak Joseba Urtasun, Guillermo Etxenike, Jesus Etxenike eta Migel Bidegainekin. Abuztuaren 6an Iruritan jokatutako finalean herriko bertze talde bat izan zuten arerio.
LARRETXEA, Donato
Nafarroako aizkolari txapelketa berreskuratu zuen segundu bakarreko aldearekin. Azaroaren 18an Donezteben jokatutako finalean ez zen Floren Nazabal izan eta saio osoan Lopezen gibeletik ibili bazen ere, azken enborrean erakustaldia emanda jantzi zuen txapela.
MARIEZKURRENA, Javier
Krisi urtea izanagatik, kamioi gidari doneztebarrak Europako txapelketan bere lehen garaipen historikoa lortu zuen Nogaron (Frantzia) ekainaren 18an.
NIEVE, Mikel
Txirrindulari leitzarrak 2010eko Espainiako Vueltako etapa nagusian lortu zuen profesionaletako lehen garaipena. 2011n ere bikain ibili da eta Italiako Giroko etaparik menditsuena ere maiatzaren 22an, kasik zazpi ordu terdi bizikleta gainean eman ondotik. Etxera bueltan herritarren omenaldia emozioz jaso zuen maiatzaren 30ean.
OLAIZOLA, Aimar
Urte zaila zuen Olaizola II.ak, sei hilabetez min hartua egon ondotik, baina hiru final handietan sartuz erantzun du. Binakakoa Beginorekin bikote eginez irabazi zien Xalari eta min hartutako Barriola ordezkatu zuen Beroizi eta buruz burukoa galdu egin zuen Xalaren kontra. Lau terdikoan, berriz, aita galdu berritan, Irujo menperatu zuen (22-12).
PILOTA LUZEA
Europako klub arteko zuzeneko esku pilota txapelketa jokatu da lehen aldiz. Europako 13 talderen arteko lehia (tartean Valentzia, Belgika, Holandakoak…) Elizondon hasi zen irailaren 3an. Baztan-Errekako boskoteak Iruñean jokatu zen azken faserako sailkatzea lortu zuen, baina Alakanteko Campello taldea suertatu zen txapeldun.
SAIZAR, Judit
17 urte besterik ez izan arren, senior nahiz junior mailako Nafarroako Triatloi txapelketak irabazi zituen kirolari leitzarrak uztailaren 10ean Tuteran, XI. Reto del Ebro Triatloian. Olinpiadetako distantzian ere (1,5 km igerian, 40 km bizikletan eta 10km lasterka) Nafarroako Triatloi txapelketa irabazi zuen abuztuaren 7an Iruñean.
SALDIAS, Andoni
Oizko erremontista, 19 urterekin, abuztuaren 13an debutatu zuen profesionaletan Hernaniko Galarretan, Oriamendi enpresarekin.
SARALEGI, Eneko
Euskal Herriko gazte mailako aizkolari txapelketa irabazi zuen irailaren 11n Leitzan. Minutu bat eta 23 segunduko aldea atera zion Eneko Otañori.
SOUZA, Xanta
Nafarroako nahiz Euskal Herriko txinga eramate txapelketak irabazi zituen lesakar-brasildarrak. Nafarroakoa uztailaren 11n Iruñean eta Euskal Herrikoa astebete beranduago Iturenen.
SUKUNTZA, M.Anjel
Gizonezkoen Nafarroako txinga eramate txapela ere eskualdean gelditu zen, Mielanjel Sukuntza leitzarraren buruan. Uztailaren 12ko finalean, Patxi Baraibar herritarrari nagusitu zitzaion.
UNTXALO, Arkaitz
Nafarroako gazte mailako buruz buruko txapelketa irabazi zuen Txarutako pilotari iturendarrak. Urriaren 12an Labriten jokatutako finalean 18-9 irabazi zion San Migueleko Garaiori. Aurrerako Sagastibeltza azpitxapeldun izan zen kadete maian.
URRUTIA, Josetxo
Nafarroako gurdi altxatze txapelketa irabazi zuen leitzarrak uztailaren 10ean Iruñean. Harrijasotzen ere Nafarroako azpitxapeldun izan zen.
URTASUN, Gorka
Frontoi laburreko Martiko txapelketa irabazi zuen iruritarrak, Errege Eguneko finalean Iñaki Lizasori 30-25 irabazita. Profesionaletan denbora gutti darama, baina bidea egiten ari da.