Urtarrilaren 17a. San Anton Eguna. Abeltzainen zaindaria. Hori dela-eta, eskualdeko zenbait herritan ospakizunak eginen dituzte. Zubietan eta Lesakako Endara auzoan meza izanen da San Anton baselizetan. Elizondon, errifa eginen dute Zahar Etxearen alde, 1867. urtetik egiten den bezalaxe.
Elizondon egun handia izaten da San Anton eguna. Goizetik, Francisco Joaquin de Iriarte Zahar Etxearen aldeko errifaren azken txartelak saltzen ibiliko dira albinteak. Denera 20.000 boleto jarri dira salgai. Lehenbiziko saria, Aspina elkarteak emandako aretzea izanen da, bigarrena zerria, hirugarrena bi bildots eta laugarrena urdaiazpikoa. Zozketa, berriz, 13:00etan eginen da Balleko Etxeko balkoian eta San Francisco Javier eskola publikoko eta Baztan Ikastolako neska-mutikoak arduratuko dira zenbakiak ateratzeaz. Bertsolariak ere ariko dira eta Baztanzopak eskainiko dira.
Lesakan igandea izanen da besta eguna
Lesakan ere meza izanen da Endara auzoko San Anton baselizan, baina beti bezala, ondoko igandean izanen da erromeria handia. Honela, urtarrilaren 22an, igande goizean mezak izanen dira orduero eta trikitixa doinuak, erroskila saltzaileak eta bertze hainbat kontu izan dira. Lesakatik eta inguruko herrietatik oinez, bizikletaz, zaldiz eta, batez ere, autoz hurbiltzeko ohitura handia izaten da. Lesakatik, mendi ibilaldia antolatu du Beti Gazte elkarteak 08:00etan plazatik abiatuta eta bertze horrenbertze egin du Etxalarko Zapingorri mendi taldeak. Arratsaldeko 18:30ean dantzaldia izanen da Plaza Zaharrean.
Zubietan ere San Anton egunak tradizio handia izan du. Izen bereko baseliza moldatu zutenetik, egun horretako meza ere berreskuratu dute.