Bertze urte batez, Mendiaren Eguna antolatu du Erreka Kirol Elkarteak larunbat honetarako, abenduak 17. Horren harira, egun osorako ekitaldiak prestatu dira. Goizean, ohiturari segituz eta 07:30ean abiatuta, mendi irteera eginen da Leurtzako zirkura, eta bide batez, Errekak Bonozorrotz mendian duen buzoia bisitatzeko aprobetxatuko da ateraldia.
13:00etan mendizaleen poteoa eginen da eta 14:30ean bazkaria Kasino elkartean. Interesatuek Titi Ostatuan eman behar dute izena ortziral hau, abenduak 15, baino lehen.
Arratsaldekoa ere aipatzeko moduko ekitaldia da. Izan ere, 12 zortzimilako igoak dituen Carlos Pauner (1964, Jaka, Espainia) mendizaleak hitzaldia eskainiko du zineman, 19:30etik aitzinera.
14 zortzimilakoak osatzeko bi falta
Jacako mendizalea 15 urte zituela hasi zen mendian eta eskalatzen, eta 17 urte betetzerako zailtasun haundiko paretak egiten hasia zen. Himalaya aldean ere aunitz ibilia da eta erran bezala, 12 zortzimilakoen tontorrak zapalduak ditu: K2 (8.611 m), Kangchenjunga (8.586 m), Lhotse (8.545 m), Makalu (8.462 m), Cho Oyu (8.201 m), Dhaulagiri (8.167 m), Manaslu (8.163 m), Nanga Parbat (8.126 m), Annapurna (8.091 m), Gasherbrum I (8.068 m) eta II (8.035 m) eta Broad Peak (8.047 m). 14 zortzimilako egiteko falta zaizkionak Everest (8.848 m) eta Shisha Pangma (8.027 m) dira.
Saskiaren zozketa
Mendiaren Egunean, Errekako saskiaren zozketa ere eginen da, 13:00etan elkartearen egoitzan.