Pasatu berri diren Kultur Egunek irekitzen dute gurean abenduko hilabete dotorea, eta bertze lekuetan bezala, Eguberrietako usain eta umorea hartzen du.
Eguberriak hotzari aurre eginez, Olentzerori ongietorria emanez, Urtezahar eta berria ospatuz eta berexia izaten den errege bezperarekin joaten zaizkigu. Ongietorri bikaina ematen zaio Olentzerori Ituren eta Aurtitzen, batean eta bertzean herriari kantatuz buelta emanez. Aurtitzen herriko haur bat gurdi batean dutela ematen dute buelta eta Iturenen astoa eta guzti plazan jaiotza biziduna egiten dute. Gainera, azken urteetan Olentzeroren bisita jaso izan dute.
Urte zaharra akitu eta mahatsak janez hasten dugu berria. Berexia izaten den Errege Bezpera ere egun polita izaten da. Arratsalde eta gauean joare soinuak entzuten dira gure herriko edozein bazterretan: arratsaldean herriko umeak aritzen dira herriari buelta ematen, Aurtitzen joaldunen atzetik trikitilari gaztetxoak ere egiten dute itzulia, eta gauean, berriz, herri afaria egiten da Aurtitzen eta Iturenen. Goizaldera joare soinuak juergarekin tartekatzen dira, eta gauean iturenen musika ere izaten da. Horrelaxe ospatzen ditugu gure herrian Eguberriak. Bertzerik gabe, Eguberri zoriontsuak opa dizkizuegu.