Alberto San Migel Malerrekako Mankomunitateko lehendakariak, Patxi Mariezkurrena Malerrekako Euskara Batzordeko buruak eta Arkaitz Illarramendi Ziurtagiriaren Elkarteko ordezkariak gidatu zuten azaroaren 25ean Malerrekako Euskara Mankomunitatearen egoitza berrian egindako Bai Euskarari Ziurtagiriaren banaketa ekitaldia. Guztira, 40 enpresa, komertzio eta bertze entitateek jaso zuten Ziurtagiria.
Mankomunitateko eragileak gustura agertu ziren, hamarretik zazpik berritu baitute iaz Ziurtagiriarekin sinatutako konpromisoa. Gisa berean, nabarmentzekoa da zazpi entitate berrik bat egin dutela egitasmoarekin: Artlepo, Arrate Estetika, Ainhoa ile-apaindegia, Ogi-Berri, Sasoi Eraikuntzak, Zergalan eta Iturengo Herriko Ostatua. 40 Ziurtagirietatik hamaikak Zerbitzua euskaraz maila lortu dute eta gainontzeko guztiek Bidean maila.
Alberto San Migel lehendakariak Ziurtagiria jaso duten entitateak zoriondu ondotik, norabide berean «urrats biziak» ematen segitzera animatu zituen. Eta Mankomunitateak euskaraz bizitzeko hautua egiten duten herritarrei aukerak eta erraztasunak ematen segitzeko konpromisoa mantenduko duela azpimarratu zuen.
Patxi Mariezkurrena ere pozik agertu zen. Bere iritziz, Ziurtagiriaren banaketa ekitaldiak agerian uzten du Malerrekan 2009an martxan jarritako Euskaraz bai dinamika «osasuntsu» dagoela. Malerrekako entitate, enpresa eta komertzioei dei egin zien aurrerantzean euskara erabiltzen segi dezaten bere egunerokoan: «Euskaraz bizitzeko jarrera gure egin eta indartuz gero, euskararen normalizaziotik gertuago egonen baikara».
Ekitaldia akitu baino lehen, Arkaitz Illarramendi Ziurtagiriaren Elkarteko ordezkariak eskerrak eman zizkien Ziurtagiria jasotzera hurbildutakoei.