Ehun dozena uso harrapatzea ezinezkoa izan bada ere, ez da batere marka txarra lortu dutena. Izan ere, kontuan hartu behar da ia sasoia erdia mendebaldeko haizearekin joan dela.
Bertzalde, urtero bezala, Pirinioetako Usategien besta ospatzekoa zen joan den abenduaren 3an. Aurtengoan, Lanne-ko usategietan tokatu zen eta bertara joan ziren Etxalarko usazaleak ere. Elkartzen diren usategien artean ranking bat egiten da eta gehien harrapatu dutenei boneta haundi bat eman zitzaien eta guttien harrapatu zutenei boneta ttiki bat. Ranking honetan aurtengo irabazlea Lanne izan da, bigarren postuan Naphal gelditu da eta hirugarren lekuan Etxalar.
Bisita gidatuak
Aurten inoiz baino jende gehiago animatu da usategietako bisita gidatuak egitera. Datuek horrela erakusten dute. Orain arte, sasoi guztian 200 lagun inguru izaten baziren, aurtengoan 320 bat lagunek egin dute bisita. Usoarekin nola lan egiten duten zuzenean ikusteko aukera hauetako gutti batzuk bakarrik izan badute ere, bisita egin duten guztiak kontent agertu dira.
Bisita gidaturik egin ez, baina usategietara usoa sareekin ehiza egiten ikustera etorri den jende kopuruak ere goiti egin du. Izan ere, eguraldi ona egin baitu ia denboraldi osoan.