Nafarroako Gobernutik datozen berriak gero eta ilunagoak dira eta Nafarroako euskarazko hedabideen panoramak ez du itxura onik. Aitzineko alean aipatu bezala, Nafarroako Gobernuak euskarazko hedabideentzako zituen dirulaguntza gero eta urriagoak desagertarazi egin nahi ditu heldu den urtean, baldin eta Gobernuak 2012rako egin duen aurrekontu proposamena onartzen bada. Eta itxura guztien arabera, onartu eginen da proposamen hori. Izan ere, Bilduk, NaBai 2011k eta Ezkerrak hurrengo urteko aurrekontuetan euskarazko dirulaguntzei eusteko eskatuz, zuzenketak aurkeztu zituzten, baina guztiak gibelera bota ditu UPN-PSNk. Gainera, 2012ko murrizketak datozen urteetan ere ezar daitezkeela adierazi du Maximino Gomez Euskarabideko zuzendariak.
Ez hori bakarrik. Aurtengo dirulaguntza ere airean dago. Nafarroako Gobernuak adjudikatutako aurtengo dirulaguntzen bigarren zatia osorik kolokan egon daiteke. Hasiera batean, «aurrekontuak doitzeko» bigarren zatiaren %35 murriztuko zela erran zuten Euskarabidetik, eta orain, bigarren zati hori %100ean desagertzeko aukera mahai gainean paratu dute.
Euskarazko hedabideentzako sosik ez, eta bitartean, Nafarroako gaztelaniazko hiru telebista kate pribatuentzat –Canal 4, Canal 6 eta Popular TV– 2.450.000 euroko diru saila aurreikusia dago, eta urteetan 3 milioi euro banatu izan ditu hiru telebista horien artean. Euskarazko hedabideentzat, berriz, 230.000 euroko partidak izan dira urterik onenean hamaika komunikabideren artean banatzeko. Gisa berean, adierazgarria da, Gobernuak publizitate instituzionalean gastatzen duen %99 baino gehiago gaztelaniazko hedabideetan gastatzen duela.
Egoera beltza ikusita, Nafarroako euskarazko hedabideak alderdi politikoetako ordezkariekin eta Nafarroako Arartekoarekin bildu dira. Horrez gain, ortziral honetan, abenduak 16, Nafarroako Parlamentuan solastuko dira, euskarazko hedabideen egoeraren berri emateko eta UPNk hartzen dituen erabaki politikoak Nafarroako euskaldunak bigarren mailako herritarrak bilakatzeko ekidin dezaten eskatzeko. Horrekin batera, 2012an hedabideetan euskara sustatzeko 650.000 euroko partida eskatuko dute, eta horietako %80 guttienez euskara hutsez lan egiten duten medioen artean bana dadila. Bide batez, lankidetzarako prest daudela jakinaraztera ere joanen dira euskarazko hedabideak ortziralean Parlamentura.
ZUZENKETAK
Bilduk, NaBai 2011k eta Ezkerrak 2012ko aurrekontuetan euskarazko dirulguntzei eusteko eskatuz aurkeztutako zuzenketak gibelera bota ditu UPN-PSNk.