Nafarroako bigarren Mailako Arpana Txapelketarekin batera antolatu zen Aldatzen, azaroaren 13an, eta lehen aldiz, Aizkolari Gazteen San Martin Saria.
14-15 urteko hiru aizkolarik hartu zuten parte eta bakoitzak bi proba egin behar izan zituen. Alde batetik, 45 ontzako enbor bat abiaduran moztu eta bertzetik, 45 ontzako hiru enbor ebaki abiaduran.
Bi probetako denborak batuta, Iker Vicenterentzat izan zen txapela. Bi saioetan nagusi izan zen Otsagabiakoa. 6 minutu eta 50 segundo behar izan zituen bi probak egiteko. Bigarren postua Zigako Joxean Etxeberriarentzat izan zen, eta honek 8 minutu eta 15 segundoko denbora egin zuen. Hirugarrena Mikel Zabaleta leitzarra izan zen. Lanak 9 minutu eta 2 segundoz egin zituen.