Miarritzeko Irati erakustazoka berrian herritar frango ibili da azken egun hauetan bertan berriki ospatu diren zonbait ferietan, hauen artean Lurrama laborantza saloina, eta baita ere edertasunaren hitz ordua edo Solutions Maison etxegintzaren inguruko azokan. Mathieu Lanbandibar ibarrundarra lehen aldikoz izan da Ipar Euskal Herrian egiten den gisa hortako feria haundienean eta parada hortaz baliatu da TTIPI TTAPA harekin mintzatzeko.
• TTIPI-TTAPA: zergatik parte hartu nahi izan duzu holako feria batean?
Mathieu Labandibar: Hemen jende ainitz ibiltzen da, ehunka egun guziz eta garrantzitsua da hemen agertzea Indonesiatik ekartzen ditudan altzariak ezagutarazteko. Ibarrunen ari naiz lanean baina jendearengana joan behar da. Lau egunez 18 731 bisitari etorri dira feriarat.
• TT: Baina feria hortan Euskal Herriko altzariak dira nagusi?
ML: Bertzerik ere badela erakutsi behar da. Nik Indonesiako altzariak ekarrarazten ditut. Kultura egurra da eta batzuetan egur birziklatuak ere baditugu. Garbi geletako altzariak proposatzen ditut gero eta gehiago. Neurriz egindako piezak ekoizten ditugu bezeroen galdeei egokitu behar baitugu. Egia da Euskal Herrian etxe ainitz zaharberritzen dela eta beraz, neurriz egindako altzariak behar ditu jendeak. Behar dugu beti egokitu.
• TT: Noiz hasi zinen lanean sail hortan?
ML: Badira jadanik 5 urte abentura hau hasi zela! Teck egurra saltzen dugu gehien gehienik eta horrek bere tokia egiten du pittaka-pittaka gure artean. Itxura ona du eta gainerat, kalitate haundiak dauzka erresistentzia haundia diolakoz urari. Hastapenean jendea harritua zen holako egurra hemen ikustea baina orain ikasten ari dira ez dugula bakarrik altzari exotikoa proposatzen. Guk linea modernoak eta garaikideak ere baditugu.
• TT: Gustuak ere aldatzen direlakoz…
ML: Hori da. Tendentziak daude, modak segitu behar dira, jakin behar da zer dagoen eta jendeak zer nahiago duen. Urte guziz berritasunak dauzkagu.
• TT: Zure lanak alde onik ere izanen du maiz Indonesiarat joan behar baituzu?
ML: Ez ezazuela uste oporrak direnik gero! Jendeak hori uste du baina ez da arras hola izaten. Han dena prestatu behar da gero kontenedoreak ekarrarazteko Europarat. Lana bururatzean bisitak egiten ditugu halere. Oreka ona da lan egitea batzuetan Senperen sorterrian eta bertzeetan munduan barna bidaiatuz. Biziki gustatzen zait biak ikustea. Etxean erakusgela bat badut zonbait altzarirekin eta bertzeak neurrirat egiten dauzkigute. Garbi geletako altzarietan harrizko edo marmolezko piezak ematen hasi gara ura biltzeko.
Miarritzeko Solutions Maison azokaren13. edizioa 2012ko urriaren 4tik 7rat ospatuko da Irati aretoan aireportuaren ondoan.