Haragi zopa barazkiekin, haragia saltsan eta kroketak

Bortzirietako Hiri Hondakinen Manko­munitatearen eskutik, Iñaki Pikabea sukaldari beratarrak janariari ahalik­ eta probetxurik haundiena ateratzeko erreze­tak­­ pres­tatu ditu.

Osagaiak

• 1/2 kilo txankarra hezur eta guzti

• 150 gramo oilo haragia

• Azenario bat

• 50 gramo garbantzo

• perrexila adarrean

• tipula bat

• 2 arraultza

• 150 gramo pasta fideo motakoa

• gatza

Errezetak

Txankarra (aretzearen belaunetik behera doan zatia) bere hezur eta guzti litro bat eta erdi inguru urez estali eta bertan azenarioa zuritua eta erdibitua, garbantzuak, perrexil ada­rrak (4 edo 5 bat) jarri eta su bizian utzi­ irakiten hasi arte. Sua jeitsi eta bitartean, tipula xerratan ebaki eta zartagin bero batean gorritzen paratu bi aldeetatik. Behin gorritua dagoe­nean, lehengo saldaren ontzira era­man, arraultzeekin batera, kolorea hartu dezan bukaerako zopa izanen denak. Motel-motel egosten utzi ordu eta erdiz eta ondotik, iragazi garbi gelditu dadin eta sutan jarri; gatza­ bota behar adina eta fideo gisako pasta ere bai, eta egosten utzi­ hamar bat minutuz. Buka­tzeko, arraul­tza bat zuritu eta zatitan moztuta zopari nahastu eta egosi­ta gelditu diren garbantzuak ere olio berotan prijitu kurruskari gelditu arte eta zopari laguntzeko ondoan zerbitza­tu­­.

Txankarrarekin, hezurra alde batera utziko dugu eta haragia bertze batera. Tipula bat, azenario erdi bat eta bi baratxuri ale ongi erregosi eta hezurra bertan bota. Edalontzi bat ardo txurirekin busti eta bi minutuz egosten utzi ondotik, ura bota tapatu arte eta ordu batez egosten utzi nahaskia. Hezurra bertatik atera eta pasapurean edo puregailuan iragazi. Berriro irakin, gatz puntua probatu eta haragia zatitan moztu ondotik bertara gehitu. Onddoa eta ilarbila gustatu ahala gehitu eta guztia hamar minutuz elka­rrekin egosi. Haragia saltsan prest izanen dugu.

Gelditu den oilo haragiari azala ken­­du eta zati ttikitan ebaki. Bexa­me­la prestatu gurina eta olioa erabili­ta, 75 g denetara, 60 g irina eta litro erdi esne bero. Gatza­ eta piper xuri hautsa gehitu eta oilas­koa nahasi. Gelditzen zaigun arraul­tza egosia ere zatitu eta nahastu eta york urdaiazpikoaren 50 g fin ebakiak ere bai. Hozten utzi­ eta irina, arraul­tza eta ogi birrindutik pasa forma borobila emanez eta oilasko kroketa sorta bat egin.