Lau herritarrek ikuskizun polita eskaini zuten joan den azaroaren 12an Olatzeko zokoan. Aizkolariak «profesionalak» ez direnez, ez ziren ausartu aizkora desafioa plazan jokatzera, baina hala ere, jendearen arreta bereganatu zuten.
Alde batetik, Dolareko Miguel Angel aritu zen aizkoran, Galtzaineko Sergio bikotekide zuela. Aurkariak Pizargineko Joxe Mari eta Dolareko Felipe izan zituzten.
Oso lehia polita izan zen eta saioa ikustera hainbat herritar bildu zen lau partehartzaileei animoak eman bidenabar.
Azkenean, Felipek eta Joxe Marik irabazi zuten apustua. Jokoan jarri zutena, berriz, Herriko Ostatuan egiteko afaria izan zen. Aizkora apustuaren ondotik, Jesus Etxeberriak eta Pello Telletxeak 2,95 metroko enbor haundi bat moztu zuten.