Landako depuradoraren ondoan dagoen edukiontziari erabilera egokia eman nahi dio Udalak. Gaur egun, jendeak gisa guztietako gauzak botatzen ditu edukiontzi horretara eta neurri haundiko trasteekin segituan betetzen da. Garraioak gastu haundia eragiten dio Udalari.
Horren aurrean, hondakinak biltzeko herritarrok ditugun beste baliabideak aprobetxatzea nahi du Udalak eta depuradora ondoko edukiontzira behar dena bakarrik botatzea. Neurri haundiko trasteak biltzeko, adibidez, Emauseko Trapuketariei deitzea nahikoa da eta eurek etortzen dira etxera bila eta dohainik. Altzariak, etxe-tresna elektrikoak... biltzen dituzte aurretik 948 451979 telefonora deituta.
Gaiaren inguruan, bandoak edo kartelak herrian barna banatzeko asmoa du Udalak.
Depuradorarako bidea
NILSA Toki Azpiegituren Nafarroako Sozietatea da depuradoraren mantenimenduaz arduratzen dena eta berak hartu zuen Landa sarreratik depuradorara doan bidean ormigoia botatzeko ardura. Mariezkurrena enpresa segituan hastekoa zen, baina azkenean, Eguberriak pasatu bitarte, atzeratu egin dira lanak, baimen guztiak ez daudelako prest.