Azaroaren 5eko euriteen ondotik aunitzek pentsatu zuten 2007ko maiatzaren 5eko hura errepikatuko ote zen. Halere, uste baino kalte guttiago eragin zituen urak. Hori bai, ura nonnahi errekatik atera zen, hainbat baratze eta landa urak hartuta gelditu ziren, garaje batzuetan ere sartu zen eta lehendik ere mugituak ziren zubi batzuk gehiago mugitu ziren.
Larrapil Sarriku auzoan, Baboleko borda aldeko bideko zubia ataskatu egin zen ura aterata eta bidea moztuta gelditu zen; orain, bidean kalteak ikus daitezke. Zentralera ura eramaten duen Bidatzerdi pareko kanala ere lehertu egin zen; baina dagoeneko konpondua dago.