Azken urteotako joeraren azken urratsa eman nahi du Nafarroako Gobernuak datorren urtean: Euskarazko hedabideentzako zituen dirulaguntza gero eta urriagoak ezerezean geldituko dira datorren urtean, baldin eta 2012rako aurrekontu proposamenean jasota daudenak betetzen badira, Gobernuak ez baitu sosik ere aurreikusi euskarazko hedabideentzako.
Topaguneak eta Nafarroako euskarazko hedabideek salatu dutenez, «dirulaguntza hauek beti egon dira guttieneko mailatik oso behera, baina urteroko murrizketen azken kapitulua egin nahi dute Gobernuko arduradunek euskarazko hedabideek zuten babes urriegia guztiz desagertaraziz». Babes ekonomiko ezari, gainera, «errekonozimendu eza» gehitu behar zaiola adierazi dute: «Nafarroako Gobernuak euskarazko hedabideak ikusezin bihurtzen ditu, ez ditu berdintasunean tratatzen ez informazioari dagokionean eta ez publizitate euskarri moduan ere».
Bitartean, «gaztelera eta gaztelerazko hedabideak babesteko neurriek bere horretan segitzen dute», Topaguneak eta Nafarroako euskarazko hedabideek azaldu dutenez. Nafarroan emititzen duten hiru telebista pribatuen artean –Canal 4, Canal 6 eta Popular television– hiru milioi euro banatu izan ditu urtero eta 2012rako aurrekontu proposamenean 2,45 milioi euro aurreikusita daude hiru telebista horientzat. Aldiz, euskarazko hedabideentzako 2012an 0 euro iragarri dituela gogoratu dute Topaguneak eta euskarazko hedabideek. Gobernuak Nafarroan publizitate insitituzionalean gastatzen duen publizitate guztia gaztelerazko medioetan gastatzen duela ere kritikatu dute.
Hedabideez haratago, Gobernuak hezkuntzan gaztelera zaintzeko saila sortzea ere «esanguratsua» dela iritzi diote, «gobernu honek bere kudeaketa eremuan dituen bi hizkuntza ofizalen aurrean duen ikuspegia eta jarrera ulertzeko».
Gobernuak 1986an onartu zuen Euskararen Legeaz ere ez dira ahaztu euskarazko hedabideak. Legeak dio komunikabideetan euskararen presentzia sustatzeko Nafarroako Gobernuak diruz eta materialez laguntzeko planak bideratuko dituela. «Dirulaguntza partida aurrekontutik desagertaraziz nola beteko du Gobernuak legeak dioena?, galdetu dute.
2011koa murriztu, 2012koa desagertarazi
2011rako onartua zegoen diru partida ere murriztua du Gobernuak, eta hala, dirulaguntzaren bigarren epealdian %35 ez dute jasoko Nafarroako euskarazko hedabideek, nahiz eta esleipena egina egon. Horren ondotik etorri da 2012ko aurrekontutik hedabideetan euskara sustatzeko diru partida desagertzeko asmoaren berria.
Euskarazko hedabideen irudiko, «azken urteotan Gobernuak gizarteari eskaini dion iritzia biziki interesatua da: badirudi euskarazko hedabideok beti kexaka gabiltzala dirulaguntzen kontuarekin eta dirulaguntza horietatik bizi garela. Irudi luke 56 langileok ez diogula zergen eta IRPFren bidez ekarpenik egiten Nafarroako ekonomiari. Iritzi hori egia ez izateaz gain, perbertsoa ere bada», adierazi dute. «Izan ere, Gobernutik jasotzen dugun ekarpen ekonomiko bakarra dirulaguntza deialdi horietan banatzen dena da, ez bertzerik». Euskarazko hedabideak «presentzia dugun eskualdeetan kontsumituenak» izan arren, «Gobernuak ez gaitu kontuan hartzen» gaineratu dute.
Gobernuaren erabakiak politikoak direla uste dute euskarazko hedabideek: «Kasu honetan, eta erabaki horien ondorioz, hedabideak ekonomikoki itolarrian utzi ditu. Kaltetuak, gurekin batera, nafar herritarrok gara. Informazio aukeratzen dugun hizkuntzan jasotzeko eskubidea eta aukera gero eta murritzagoa delako».
2008an, euskarazko hedabideen egoera egonkortzeko hitzarmen sina zezan exijitu zion Parlamentuak Gobernuari, tartean PSNren botoekin. Baina Gobernuak eskaerari «entzungor» egin diola aipatu dute hedabideek. «Orain Gobernuan UPN eta PSN daude, non gelditu dira PSNrentzako eskaera horiek?».
Horrekin batera, hedabideek eskaria luzatu diete Nafarroako gizarteari, «egoera larriaren kontzientzia hartzeko, erantzukizunez jokatzeko eta euskarazko hedabideak babesteko». Baina baita Gobernuan eta Parlamentuan dauden alderdiei ere: «2012ko aurrekontuetan berezarri dezatela hedabideetan euskara sustatzeko dirulaguntza deialdia, eta ekonomikoki duina izan dadila, edo aurreko urteen parekoa guttienez. Eta hori izan dadila lehen urratsa behar dugun hitzarmena sinatzeko. 2012ko aurrekontua babesten duten alderdiek euskarazko hedabideen heriotza-zigorra sinatuko dute».
EUSKARAZKO HEDABIDEAK
«2012ko aurrekontua onartzen duten alderdiek euskarazko hedabideen heriotza-zigorra sinatuko dute»
DATUA
0 EURO
aurreikusi ditu Nafarroako Gobernuak euskarazko hedabideentzako 2012rako.